كيفكم ياقمرات يارب تكونو بخير انا عملت يابنات اكلة سمك وقلت لازم انزلهلكم مع انى مش بحب موضوع تصغير الصور وتحملها بس علشان خاطر عيونكم يهون التعب ياقمرات هبدء بالسمك وتنضيفه لانى فى ناس كتير متعرفش طريقة تنضيف سمك موسى والسمك يابنات لو متنضفش صح بيبقى زفر وطعمه مش حلو الاول هوريكو شكله على فكره يابنات انا تعبت جدا فى رفع الصور من المنتدى وفى الاخر فشلت زى كل مره
وده الجانب التانى هنمسكها كده يابنات من عند الخياشيم ونسحب الجلده بالراحه من عند الراس وبعدين نشده كلها مره وحده
وهنا بعد ماسلخناها من الجنبين شايفين الجلد بتاعها
انا ليه بوريكم بالتفصيل لانى فى ناس كتير جدا بتنضفه عند بتاع السمك وطبعا بيسيب الجلده البيضه وده طبعا هيخلى طعمه زفر ومش حلو علشان كده لو انتى هتنضفيه عند بتاع السمك لازم تاخدى بالك وتقفى على ايده علشان مايغشكيش طبعا هو عايز ينجز ويخلص نفسه
وبعد كده يابنات هنضفه نقص الخايشيم ونفتح بطنه ونقص الزاعنف وحته من الديل ونغسله كويس
نيجى بقى للتتبيله كلنا نعرفها طبعا توم وكمون وشطه وملح وبهارات سمك وليمون ودى بتكون على حسب الكميه بتاعتك
وبعدين نجيب الدقيق ونضيف عليه بكينج بودر علشان الزيت ميتحرقش ويبقى لونه اسود ونقلب فيه السمك ونعفره ونقليه هو مش بياخد حاجه على النار يعنى يدوب يتحمر علشان ميبقاش ناشف وده بعد مااتحمر يابنات
نيجى بقى لرز الصياديه ودى المكونات بتاعته توم بالشطه والكمون والملح وطماطميه مفرومه وبصله مقطعه وملح وفلفل اسمر
هنقسم التوم اولا هنحمر البصله لغايه مايبقى لونها بنى وبعدين نضيف عليها نصف التوم ونقلبه تقليبه وشمى بقى الريحه الجميله وبعدين ضيفى عليهم الطماطمايه المبشوره
وبعدين الميه طبعا على حسب الكميه يعنى مثلا لو انا عملت مقدار 2كوب رز بضيف مقدار 3 كوب ماء هيطلع معاكى مظبوط جدا الكلام ده طبعا للرز المصرى بعد غليان الميه هنضيف باقى التومه والملح والفلفل الاسمر وطبعا الرز بعد غسله شايفين هنا الميه بقى لونها بنى ازاى وتسبيه يتشرب وتهدى النار على الاخر وتسبيه حوالى ربع ساعه مش اكتر اهم حاجه الحله تكون محكمة الغلق
وهنا بعد ماستوى
وطبعا انا مانسيتش انى عامله رجيم فاعملت ليا طبق سمك موسى شوربه الطريقه سهله جدا وكمان طعمه جميل هنجيب حله ونضيف فيها معلقه وحده بس زيت ونضيف عليه فصين مستكه وفصين حبهان والميه ونقطع عليها بصله وملح وفلفل اسمر وكمون واول ما البصله تستوى هنضيف السمك واول مايغلى غلوه وحده بس نطفى عليه ونعصر الليمون بيبقى جميل جدا وصحى
وده طبق زيتون مخلل من عمايل اديا
لو عجبك موضوعى قيمى لانى بجد تعبت فيه ولانى اكتر حاجه بتزهقنى تحميل الصور وتصغيرها بس علشان بحبكم فى الله قلت اتعب وتعبكم راحه ياقمرات
نورتي القسم
و طبعا في انتظار المزيد
لك احلى وسام وتقييم واعجاااااااااااااااااااااااااااااااب
لا شكر على واجب حبيبتي
وان شاء الله تتعودي على تصغير الصور و تحميلها عشان
نستفيد و نستمتع بوصفاتك يا قمرررررررررررررررر
تسلم ايديكي
وشكل الزيتون مستحيييل يفتح النفس
واحلى تقييم