ازيكم يا حبيباتى انا اول مرة اتكلم عن نفسى فمش عارفه هنجح فى توصيل المعلومات وللا لا
المهم انا طول عمرى وزنى فى الثمانينات ولا كنت ازيد ولا اقل وما كنت بفكر فى عمل ريجيم ابدا بس فجأه زاد وزنى فى ثلاثة شهور من 84 الى 104
وهنا كانت صدمتى
لانى عمرى ما اتوقعت انى اقرا على ميزانى رقم 100 ابدا فمابالكوا 104وهنا خدت القرار انه لا انا كده بستهبل هو عشان جوزى ساكت وما بيتكلمش ومش راضى يكسفنى افضل مستهبله هههههههه 
قلت لا طبعا ده غير انى ليا بنت 8 سنين عماله تقوللى من زمان نفسى اشوفك رفيعه وبتلبسى بناطيل جينز وبيجامات حلوة زى فله هههه
اخدت القرار وعدلت طريقة اكلى انا ما كانتش مشكلتى ابدا فى الاكل وده اللى افادنى فى نزول وزنى كده مشكلتى كانت فى الحلويات والشيكولاته والايس كريم يعنى سعرات حراريه عاليه وانا عامله فيها نونه وعماله اكل منها 
بطلت الحلويات وبطلت وضع السكر فى مشروباتى تماما ونزل وزنى اول مرة 4كيلو فى 10 ايام 
طبعا ده عشان الجسم مصدوم من الحرمان المفاجىء من اللى اتعود عليه وبكثرة بس بعد كده بدأت الدهون تعمل عليا زكيه وتحتفظ بالدهون وانا عماله اعمل رياضة واقلل الاكل ومش واخده بالى ان ربنا خلق كل شىء وهو عارف يدافع عن نفسه ازاى……. الدهون لما بتلاقى مش بيجيلها زوار جديده بتمسك فى اللى موجوده عندها وما بتخليهاش تخرج ابدا مهما عملتى وده اللى بنقول عليه الثبات فى الوزن يعنى المجهود فى الرياضة والتقليل فى الاكل نتيجته هو عدم زياده الوزن لانك بتحرقى اللى بيدخل بس اللى جسمك محتفظ بيه مش راضى
انا بقى كنت بضحك على الدهون ..
… إزااااااااااااااااى ؟؟؟ 
أقولكوا كنت كل يومين اكل شىء اما حلو او من الممنوعا ت فى الاكل بس طبعا بكميه قليله جدا بس المقصود بيها انك تلهى الدهون اللى فى جسمك باستقبال الجديده فى الحين اللى انتى فيه بتخططى لخروج ضعفهم بالرياضة لان المجهود اللى بتعمليه بيحرق المخزون مش اللى بيتاكل فى اليوم نفسه وطبعا مع وصفات زياده الحرق افادتنى كتير والحمد لله وكمان عندى نصيحه تانية وهى الاستمرار وطلب العون من رب العالمين لان بجد الصبر وعدم انتظار النتائج الهايله والسريعه ده من اسباب نجاحى فى نزول الوزن
مش عارفه اذا كنت افادتكوا وللا ايه ؟؟؟؟ بس يا ريت تدعولى ربنا يحفظلى ابنى وبناتى الثلاثه ويحفظ لى زوجى لان هو نعم العون لى 
ربنا يوفقك كريستاله ويحفظلك زوجك وبناتك
الله يوفقك حبيبتي ويحفظ لك عيالك وزوجك ادعولي خطيبي جنني يبيني انحف يارب امين انا ننزل يارب امين
بشورة يا رب يا قلبى تنحفى وتكونى احلى زوجه فى الدنيا بعيون زوجك يا رب
نانو وسمية شكرا على الدعاء ربنا يكرمكن يا رب
ربنا يحفظهملك جميعا