السلام عليكم ورحمة الله تعالى وبركاته
تحية طيبه, وبعد :
اكيد كلكم تحبون المندي …. …
لذلك حبيت تجربون طريقتي الجديدة (لا تقولون قديمة وتحبطوني ….)
المهم …. هذا المندي تقدرين تعملينه بالدجاج او اللحم او بدون …. وهو لذيذ وخفيف ويكفي تشمين ريحته بتعرفين طعمه قبل لا تذوقينه ….
بسم الله نبدأ …
المقادير :
2 كوب رز مغسول ومنقوع …. انا استخدمت بسمتي …
لحم او دجاج …. مغسول وجاهز …. استخدمت هالمرة لحم عجل وردي بالعظم …
بهارات صحيحة ( هيل +دارسين +مسمار )
مكعب ماجي
فص ثوم مدقوق
فلفل أخضر بارد او متوسط الحرارة حسب المتوفر … ممكن استخدام فلفل ملون …
نصف حبة طماطم مقطعة مكعبات صغيرة ….
بصلة صغيرة مفرومة …..
نصف جزرة مبشورة ….
حبة فلفل احمر حار….
الطريقة :
اسلقي اللحم او الدجاج مع البهارت الصحيحة ومكعب ماجي وملح ….استخدمت قدر الضغط لأنه اسرع …. واحتفظي بماء السلق ….
وبعد ما ينضج اللحم … تبليه ببهارات مشكلة مطحونة + صبغة صفراء وملح حسب الرغبة وصفيه بصينية بايركس ورشي عليه شوي زيت ودخليه الفرن الحار الى ان يتحمر … ممكن ترشينه بقليل من ماء السلق حتى يتحمر بدون ما يحترق ….
صفي الرز من ماء النقع وحطيه بصينية فرن وحطي عليه الخضار الفلفل والجزر والبصل والثوم + كوبين من ماء السلق + قطعة زبدة او رشة زيت … وعدلي الملح ….
حطي كوب صغير فيه شوي زيت في وسط الصينية
وغطي الصينية بالقصدير …. ودخليها الفرن الحار …. الى ان ينشف الرز شوي …. بعدين تكونين مجهزة فحم والع …. اكشفي القصدير وحطي الجمر على الزيت واكتميه بسرعة بالقصدير ورجعيه الفرن …وخفضي حرارة الفرن …. . انا بعض الأحيان اطفي الفرن اذا كان حار كثير واخلي الرز يتنشف على راحته لوقت التقديم …. وهو ما ياخذ اكثر من نص ساعة …
ان شاءالله اجرب طريقتك حبيبتي
أمي الدنيا ومافيهااا__ بنت الأسكندريه_ الحساسه
منورين حبايبي الموضوع وجربو الوصفه ماراااح تندمون طيبه كثير كثير والي تجربهااا تقول شنو النتيجه
