حمام محشي مع طاجن رز معمر
حمام محشي مع طاجن رز معمر
ده اول موضوع لي هنا في القسم
ولاني مش شطوره اوي يعني فيارب تستحملوني
النهارده مصوره لكم طريقة الحمام المحشي ومعاه رز معمر لحاله(يعني الحمام مش مدفون في الرز)
لان ابني الصغير بيحب الحمام جدا وبيحب ياكلها لوحدها مش مع الرز
يلا بينا نسمي بسم الله
نبدا بالرز المعمر
ده الرز مغسول وحطيته في صينيه بايركس لان الصينيه الالومنيوم بتاعتي عند اختي
بس بجد بتطلع في البايركس حلوه بس الالومنيوم والطاجن احلي واحلي
المهم دول 3 كوب رز بحط عليهم 4 كوب حليب
وشوية ملح
ومعلقة قشطه او زبده او معلقة سمن بلدي (الموجود يعني)
وسر من عندي (كوب زبادي ادعكيه مع الرز والزبده قبل ما تضيفي اللبن هيخلوا الرز زي الفل وكأنك مزوداه قشطه)
والان نضعهم تحت الشوايه الي ان يتكون وش للرز
ثم نحطه في اسفل الفرن ونهدي او نطفي الشوايه الي ان يستوي الرز
و نشوفه بالمعلقه من جنب الصينيه علشان نتاكد انها استوت
وبعدين نطفي الفرن ونسيبها في الفرن شويه لحد ما الرز يستوي براحته(يتردد زي ما امي بتقول ربنا يطول في عمرها
)
وده شكله النهائي بس هي اتحمرت مني شويه والزبده باينه علي الوش
ثانيا الحمام المحشي
نغسل الحمام كويس من جوه ومن بره
ونغسل شوية رز ونحمره في طاسه علي النار
معيار الرز تقريبا فنجان لكل حمامه
وبعد مايحمر الرز نحط عليه بصلايه مبشوره وطماطمايه مبشوره وملح وفلفل اسمر وكمون حسب الرغبه
(انا نسيت اصور الخطوات دي)
نبدأ الان في حشو الحمامه من تحت وبصابع ايدنا ندخل الرز من جوه الحمامه للصدر
وناخد بالنا علشان منملاش الحمامه بالرز علشان متفرقعش مننا يعني نسيب مجال علشان الرز بيكبر لما يستوي
وبعد مانحشي الحمامه نقفلها من تحت بالكبده والقناصه بتاعتها ونكتفها
ونسقطها في حله فيها ميه بتغلي ومعاها طماطمايه وبصلايه وفلفل اسود وحبهان وورق لوري
ولما تستوي نحطها في صينيه ونحمرها في الفرن (مننساش نحط عليها حته صغيره من الزبده علشان تتحمر حلو)او ممكن ندوب معلقة صلصه في شوية ميه وندهنها علشان تحمر لو عامله رجيم وبلاها الزبده 
وده الشكل النهائي
والطبق ده ليكوا ياحلوين
وبالهنا والشفا
ايه رايكم 
حبيبه قلبي و الله فرحاااااانه اوي انك نزلتي وصفه من اديك يا قمرررررررررررر
يعطيك الف عافيه شكلو بيشهي
على فكره انا من المساء بتفرج في الصور بمعرض الصور و بقووووووووب يا ترى من الحلوه الي عامله الاكل
عشان اعزم نفسي ههههههه
نورتي حبيبتي احلى تقييم واحلى وسام
ويارب دايما تنزلي وصفاتك
تسلمين شكلها مرة تجنن
طريقة رائعة جداً
وأكيد مذاقها أروع ماشاء الله عليكِ
والله شهتينا للاكل المصري
عاد انا والاكلات المصرية عشرة عمر وسنين
ههههههههههههههههههه
ربي يعطيك الف عافية
ولاتحرمينا طيب تواجدك في هذا القسم
مشهي وتسلم يداك عليه
بالهناء والعافية عليكم حبيبتي 🙂
ماشاء الله عجبني الحمام المحشي جداااا