طريقة تارت التفاح
نبدأ بسم الله
المقادير
ربع كوب ماء-بيضة – ملعقة كبيرة خل – 2كوب دقيق – نص ملعقة صغير ملح – ربع كوب زيت – ربع كوب سمن – فانيليا
المقادير للحشو
5 تفاحات مقطعين مكعبات – كوب ونص سكر ابيض عادى – ملعقتين كبار قرفة(حسب
الرغبة ممكن تزودى او تنقصى) – ملعقتين كبار سمنة وبردو ممكن تزودى
اول حاجة هنجيب البيضة والفانيليا والخل والميه ونضربهم مع بعض
نسيبهم ونجيب بولا تانيه نحط فيها الدقيق وعليه الزيت والسمنة وندعكهم بايدينا
بصراحة انا لما عجنتهم لقتهم ناعمين اوى فزودت دقيق لغاية مابقت عاملة زى فتافيت العيش
بعض كده حطيت البيض والخل اللى ضربناهم على الدقيق ونعجنهم هنلاقيها ناعمة وسهلة التشكيل
نركن دلوقتى العجينة
نيجى للحشو نحط التفاح المتقطع مع القرفة والسكر والسمنة ونخلطهم بايدينا
خلى بالكم المقادير دى سواء العجينة او الحشو لصينية مقاس 24
نجيب الصينية وندهنها سمنة
ونقسم العجينة كورتين كورة عادية وكورة اكبر شوية
الكبيرة دى اللى هنغطى بيها الحشو
نفرد الكورة الصغيرة بالنشابة ونحطها فى الصينية ولو فيه زيادات نشيلها بعد
كده نحط الحشو ونفرد الكورة الكبيرة ونغطى بيها الحشو بأحكام يعنى تقفلى
على الحشو كويس اوى
وتخرمى الوش من فوق بالشوكة
نيجى بقى للخبز
انا خبزتها على حرارة 125
بتاخد ساعة تقريبا
وعايزة اقولكم سر
اى حاجة بخبزها فى الفرن عشان متنشفش وتتلسع من تحت بحط من تحت اقصد الصاجة اللى فوق النار صينية فيها ميه
بحيث انها بتبقى تحت الصينية اللى بنعمل فيها الحاجة
بتدى طراوة للحاجة اللى بنخبزها وتخليها متتحرقش
بعد نص ساعة هتلاقيها الحشو نزل منه صوص
هتطلعى الصينية وتاخدى الصوص ده بالمعلقة تسقى بيه الوش من فوق وتدخليها الفرن تانى
ولما تحسى انها استوت والوش احمر تطفى وتشغلى الشواية عشان تاخد لمعة من فوق
دلوقتى بقى هسيبكم مع الصور بالتفصيل
دى بعد ربع ساعة من مادخلتها الفرن واللى تحتها دى الصينية اللى فيها ميه اللى قلت عليها
دى لما طلعتها وحطيت الصوص على الوش
دى لما استوت وطلعتها من الفرن قبل التقطيع
طريقة جميلة
ان شاء الله المرة القادمة تكتبي اسمك علي الصور لحفظ حقوقك
بارك الله فيك
تسلم الايادى اختى حبيبه على هذا التارت الرائع
شكله شهى جدا بارك الله فيكِ
تقبلى تقيمى وفى انتظار المزيد من موضوعاتك المميزه
طريقة جميلة
ان شاء الله المرة القادمة تكتبي اسمك علي الصور لحفظ حقوقك
بارك الله فيك
من عيونى ياقمر
تصدقى أنا بجرب أحمل الصور الأول بشوف مركز الرفع هيشتغل معايا لقيت الصور اتحملت
ماصدقت وروحت منزلة الموضوع
حاضر حاضر ياجميلة
يسلم لى مرورك الغالى
تسلم الايادى اختى حبيبه على هذا التارت الرائع
شكله شهى جدا بارك الله فيكِ
تقبلى تقيمى وفى انتظار المزيد من موضوعاتك المميزه
معقولة القمر منور موضوعى
بجد أنا سعيدة جدااااااااااااااااااااااااااااااااااا
تسلمى ياقلبى على ردك الطيب
ومرورك الغالى
طريقة رائعة
تسلم ايدك يا قمر