لأ بلاش افرضى حد من قرايبك شافنا؟ولا حد من اصحاب أخوكى… فى الكلية؟ان شاء الله حبيبتى بكره نتخطب وامسك ايديكى قدام الدنيا كلها
انت ليه مش بتمسك ايدى واحنا ماشيين فى الشارع؟
علشان مش عاوز حد يفتكر اننا عشان اتخطبنا هنصيع…ان شاء الله بكره هنتجوز وامسك ايدك وانت مراتى حبيبتى
…
انت ليه مش بتمسك ايدى واحنا ماشيين فى الشارع؟
ياحبيبتى احنا مش مراهقين بقى هنمسك ايد بعض فى الشارع احنا اتنين متجوزين ومحترمين
انت ليه مش بتمسك ايدى واحنا ماشيين فى الشارع؟
يعنى امسك ايدك ولا امسك ايد البنت ولا اشيل الأكياس دى كلها
انت ليه مش بتمسك ايدى واحنا ماشيين فى الشارع؟
ايدك ايه بس اللى هامسكها دلوقتى!! انت عاوزة جوز بنتك يقول علينا كبرنا وخرفنا؟؟
"أنا بس كان نفسى تمسك ايدى واحنا ماشيين فى الشارع …عادى يعنى…من غير مناسبة أو هدف محدد بس تمسك ايدى…
ماكنتش عاوزاك تمسكها عشان تسندنى أو علشان مش قادرة امشى لوحدى…أو علشان ده الصح اللى المفروض تعمله مع مراتك ولا عشان زى دلوقتى أنت خايف لو سبتها وقمت..هأموت…!!
لأ … تمسك ايدى عشان أنت عاوزها تفضل فى ايدك…بس
اكيد دي بتحصل كتيير
بس ايه رايكم فالراجل الي يقول كده او يرفض يمسك ايد زوجته ؟
ياريت اعرف رايكم
