قصص من الحياة ترويها لنا العضوات 2024.

……..
وهذي اول قصصي لكم وليست الاخيره

قرأتها بموقع صحيفة سبق بقلم صاحبتها ..

_____________________________________

أصعب مواقف حياتي كان في رحلة برية ..

_____________________________________

طلعنا مع خوالي رحلة (كشتة) عند جبال , والله لا يعيدها من كشتة .. طلبوا مني بنات خالي أرجع أنام معهم ببيتهم , قلت لهم إن أمي مستحيل ترضى ..

لكن ما أدري وش اللي خلاني أسأل أمي لحالها ووافقت إني أنام عندهم بحجة إن عيال خالي مسافرين ..

وصلني مسج ع الجوال بأن نتائج الكلية طالعه ..

رحت أركض للجبل أدق ع صديقاتي لأن الأبراج كانت زفت تحت ..

طلعت الجبل وجلست وراء صخرة كبيرة وقمت أقفل من فلانة وأدق ع علانة .. وكل شوي متصلة وحدة ..
أخذني الوقت والحماس مع النتايج وما انتبهت إلا لبطاريتي فرغت ..

قمت بأرجع لأهلي وكانت المفااااااااااااااااااااااااااجأة ..
كلهم ماشين وما شفت إلا سياراتهم تختفي شوي شوي ..

(أهلي مشوا على أساس إني مع خالي .. وخالي مشى على أساس إن أمي رافضة أرجع معهم)

وبطاريتي فاااااااااااااااااااااااارغة .. والشمس بدت تغيب ..
والبرد والخوف آكلين قلبي ..!

ما كان قدامي حل غير إني أجلس بمكاني , وأردد شيء من الأذكار والأدعية لحد ما يفقدوني ويرجعون لي ..

لكن الموقف كان أصعب من إني أتذكر آية وحدة , آية الكرسي قريتها 7 مرات وأنا أخطي فيها ..

انتظرت على أمل يجيني أحد .. لكن ما جاء غير الظلام و 6 سيارات , كلها لشباب جلسوا بنفس مكان أهلي ..

نزلوا معهم عود وشراب وشيش وبلاوي سوداء ..

زادت علي مصيبتي .. حاولت أتخفى عنهم قد ما أقدر .. كنت منطوية على نفسي وكل ضلع فيني يرجف .. حاولت أبكي بس ما قدرت ..!

واللي كان ناقصني العجوز اللي تطل علي من أعلى الجبل وتناظرني , وإذا التفت لها راحت تركض على إيديها ورجليها مع بعض (مثل حبو الأطفال لكن ركبها ما تلامس الأرض) وكانت سريعة حيل ..

عند هذي أغمي علي مرتين , لكني أصحي بكل مرة وأنا بنفس مكاني , وعلى نفس وضعي ..

قرب الفجر … وضعي من سيء لأسوأ .. تذكرت قصة الثلاثة من بني إسرائيل اللي انغلقت عليهم الصخرة .. حاولت أدعي بعمل صالح عملته بحياتي , لكني للأسف ما تذكرت شيء يسوى >>> تعلمين بعد ^_^

بعد فترة جاء رجلين ملتزمين ينصحون الشباب اللي جالسين بمكاننا , وسبحان الله كأن الله أرسلهم لي قبل يرسلهم لهم ..

عاد أنا أول ما لمحت لحاهم وأنا أنزل صاروخ من الجبل وأتعلق بثيابهم وأصارخ من شد الصياح وأنا أستنجد فيهم وأهذ لهم سالفتي بالتفصيل الممل لكنهم ما فهموا علي ولا كلمة ^_^
لكنهم سمّوا علي , ومسحوا على راسي وهدوني لحد ما فقدت وعيي بين يديهم ..

صحيت وشالوني معهم لمخيمهم (العائلي) لكن واحد من الشباب اعترض وقام يسبهم بكلام بذيء , تجاهلوه ومشوا لكنه وقف بوجيههم يبيهم يخلوني >>> وش يبي ذا ؟!!

تهاوشوا معه وكبرت المشكلة بينهم , وتعدى حدوده كثير لحد ما وصلها للضرب والسكاكين ..
ومع الفوضى والمضارب سحبني واحد من السرابيت لسيارته وقفلها علي وحاول يتسلل فيني منهم ..
لكن فرج الله وصل ………………………………………..
جوا أهلي >>> بــــــــــــــــــدري !!!!

هربت من سيارته لسيارة خالي مثل المجنونة .. نزلوا باقي خوالي وأخواني وفكوهم بالسلاح ..

وصرخ واحد من الملتزمين بواحد من خوالي : (إذا تبي تسلم وعرضك يسلم اركب سيارتك وامش)

ورجعنا للبيت من غير ما نعرف وش صار عليهم .
من بكرى قدرت أجمّع وعلمتهم السالفة .. انجنوا أخواني وخوالي ورجعوا لهم بس ما لقوا أحد ..

كان أصعب موقف , وأردى رحلة , وأسوأ خبر نجاح , وألعن شباب (وحوش) شفتهم وسمعت عنهم بحياتي ..

(اعذروني ع الإطالة .. ما قدرت أتغاضى عن أي شيء .. يمكن لأن كل حركة صارت بالموقف لها تأثير كبير علي , ومستحيل أنساه أو أتناساه)

————————————–

أختكم : عذبة المبـــــــ/ـــــــسم
______________________________________