عنايتى الشخصية قبل الدورة الشهرية على طريقة المشاهير
عنايتى الشخصية قبل الدورة الشهرية على طريقة المشاهير
عنايتى الشخصية قبل الدورة الشهرية على طريقة المشاهير
السلام عليكم ورحمة الله وبركاته
دا أول موضوع ليا بهذا القسم يارب الكل يستفاد من فكرة الموضوع
ومش هقول ما تنسوش التقييم .. لا هقول ما تنسوش الدعاء ليا بظهر الغيب بصلاح الحال وان ربنا يكفر عنى سيئاتى ويجعل الجنة مسواى بلا سابقة عذاب .. واشوف بناتى دايما من الصالحات
إلى كل سيدة ناسية نفسها ومهملة فى روحها .. وكل تفكيرها منصب على ان زوجها يبقا انجح راجل واولادها يبقوا احسن الناس .. تحياتى وحبى واحترامى لكى سيدتى الجميلة انتى فعلا سيدة جميلة بلا انتى من اجمل نساء الأرض ومن حقك حد يحس بيكى حد يحبك بالشكل اللى يرضيكى .. من حقك تحسى أنك جميلة .. بس ازاى وجوزك مشغول فى الشغل وخد على شكلك خلاص وبيجى تعبان ومعندوش استعداد يتكلم .. والعيال مشغولين بنفسهم وبالدراسة واخدوا خلاص على أنك بتعطى مش بتخدى اتعودوا على كدة خلاص دول ساعات بينسوا يصبحوا عليكى ولا يقولولك تصبحى على خير ولا شكراً يا ماما .. طب ياترا الحل اية .. احكى يا شهرزاد لحسن ننام منك ..
الحل انك تحبى نفسك .. تتعدى بمرض نفسى اسمه النرجسية .. بعد الشر عنكم جميعاً بس ساعات العدوى ببعض الأمراض بتبقا مفيدة وصحية .. زى الحب و التفائل و السعادة و حب الخير للآخرين ..
تعريف النرجسية المراضية ..
الصفة الأساسية في الشخصية النرجسية هي الأنانية فالنرجسي عاشق لنفسه ويرى أنه الأفضل والأجمل والأذكى ويرى الناس أقل منه ولذلك فهو يستبيح لنفسه استغلال الناس والسخرية منهم.
والنرجسي يهتم كثيرا بمظهره وأناقته ويدقق كثيرا في اختيار ملابسه ويعنيه كيف يبدو في عيون الآخرين وكيف يثير أعجابهم, ويستفزه التجاهل من قبلهم جدا ويحنقه النقد ولا يريد أن يسمع إلا المديح وكلمات الأعجاب.
طب اية رايك تبقى نرجسية مش مراضية .. كونى نرجسية .. عاشقة لنفسك وترى أنك الأفضل والأجمل والأذكى .. اهتمى كثيرا بمظهرك وأناقتك ودققى كثيرا في اختيار ملابسك واهتمى واعتنى بكيف تبدى في عيون الآخرين ( زوجك – اولادك – اهلك – اهل زوجك )
الموضوع دا فكرت فيه بعد ما سمعت حوار للمطربة انغام .. معاذ الله ان اشبهكم بها بس لية ما تعشيش زى الفنانات والممثلات لمدة يومين ولا ثلاثة ولا اسبوع فى بيتك .. تحسى بانؤثتك وجمالك عيشى لنفسك لمدة يومين .. طب ازاى يا شهرزاد قولى بقا نعمل اية الله يخليكى ..
الأول : تدعيلى دعوة حلوة عن ظهر الغيب
ثانياً : تقولى لنفسك أنا اجمل نساء الدنيا .. أنا جميلة سعيدة وبحب نفسى فهى تستحق منى كل الحب – التقدير – الاطراء – الاهتمام – ان اسعدها واطبطب عليها .. وانى اشوفها دايما جميلة
ثالثاً : تنسى تماما انك بتعملى دا عشان جوزك يقولك كلمتين لالالالا .. والف لالالالا دا عشانك انتى .. عشان انتى تستاهلى دا
رابعاً : تشوفى ميزانية بيتك اد اية .. بالميت لو بتاخدى فى الاسبوع 100ج قابلة للزيادة والنقصان شيلى منه 10ج فى الاسبوع يعنى فى الشهر 40ج معاكى فى حصالتك 40ج امسكى فيهم دا كنزك اوعى تتخلى عنه انتى تستاهلى هذا المصروف الشخصى ، طب لو ظروفى وحشة وباخد 200ج فى الشهر شيلى 5ج يبقا معاكى 20ج حلوين قوى نعمة ربنا يحفظها من الزوال .. ما الدنيا صعبة هنعمل اية هنموت لا هنعيش ولازم نعيش بشكل صح .. والشكل الصح لازم ينبع من جوانا احنا و نكون عايزين نحققه صح
ننطلق بقا معاكى مصروفك بصى هتعملى اية .. عارفة الكوافيرة اللى فى أول الشارع بتاعك .. ولا اللى فى الشارع اللى وراكى .. ولا يمكن بعدكم بشارعين .. ركزى هنحتاجها بعدين بعد شوية من الأن نركز بقا فى اللى جاى
ملحوظة مهمة جدا ولها اسباب عدة : انتى عارفة ميعاد دورتك ركزى قبلها بيوم اعملى كل اللى جاى لية بقا
1 – عشان لما هتعملى اللى جاى هتبقا حالتك النفسية احسن وخصوصاً ان الدورة ساعات كتير بتخلى نفسيتك وحشة
2 – عشان شعرك يفضل اطول وقت ممكن بنفس الشكل ما فيش اغتسال بس فى حاجة تانية هقولك عليها بعدين ( لأنك لازم تغسلى جسمك كل يوم وتتبرفنى ) طول ايام الدورة .
3 – عشان تريحى جسمك اطول وقت ممكن من اشغال البيت اثناء الدورة لأننا بيبقا جسمنا مرهق الله يحمينا ويحفظنا من كل شر
حضرتك قبل الدورة برده تمسكى الشقة تظبطيها جدا وتجهزى آكل ليومين أو ثلاثة على حسب نظامك فى الآكل وترتبى حالك
ندخل على التقيل ما كل حاجة حلوة لازم تتتعبى قبلها عشان تحسى بطعمها ..
بعد ما تعشى العيال وابوهم ويناموا .. تعملى سويت كامل لجسمك طب ما انا بعمل بعد الدورة لا خليها المرة دى قبل الدورة .. تعملى صنفرة لوشك طب اعملها بأية بسيطة عارفة الرضة اللى بتطلع من العيش حوشيها ولا اشترى بـ 1 ج من العطار وادعكى وشك بشكل دائرى كدة .. وبعدين اضربى شوية نشا بمعلقتين لبن أو معلقتين زبادى وحطيهم على وشك كل دا وانتى فى الحمام ، تشغلى السخان على حرارة عالية وتحطى مية لحد ما رجلك تستحملها وشوية صابون انا مرة شفت واحدة حطت اريال بتاع الغسيل انتى وامكانياتك لا اقولك بلاش بالصابونة بتاعة الوش وعندك حجر وادعكى بالصابونة وبعدها بالحجر لحد ما تنعم وتبطل تخربش فى مفرش السرير ،
وتستحمى حماية العيد اه العيد ما بكرة العيد عشان روحى اعملها عيد لية لا ما أنا استحق احلى عيد .. أنا ست كل الأعياد .. خليكى على النغمة دى اوعى تقعى من نفسك بالله عليكى
خلصنا .. نعمل اية بعد الخروج من الحمام .. يا خارجة من باب الحمام وكل خد عليه خوخة .. خوخة .. خوووووووووووووخة
عندك كريم قشطة ادعكى جسمك .. ما فيش هاتى شوية زيت زرة أو عباد شمس من المطبخ أو كيس فزلين من أبو ربع جنية وادهنى جسمك كله البسى جلبية مريحة وياريت تبقا قطن عشان جسمك يرتاح و صلى ركعتين شكر لله انك قادرة تعملى كدة .. اقرائى شوية قرآن
ونامى وانتى بتدعيلى مش بتدعى عليا ..
كان فى ست كوافيرة اتكلمنا عنها فى الكام سطر فاتو ارجعيلها …. اب .. لا انزل عندها سشورى شعرك ولا اقولك اكوية لو محتاج خليه ليس اه ليس عشان تحسى انك موزة شعرها سايح ونايح ..
تدخلى على تسريحتك ودولابك تطلعى حاجة ما لبستهاش من زمن مش قميص ركزى .. بنطلون استريتش على بدى كارينا جامد كدة وبراه عشان الدنيا تبقا متظبطة .. ندخل على الميكب حاجة كدة زى الممثلين زى اى واحدة بيعجبك شكلها ادخلى هنا المنتدى وشوفى ازاى تحطى الميكب اللى يعجبك ..
حطى مانكير .. البسى ببش مشجلع ولا حتى صندل اية المشكلة ما أنا احلى نجمة فى الدنيا واجمل نساء الدنيا ..
يارب اكون قدرت اساعدك انك تكونى احلى ست فى الدنيا بس دا لازم ينبع من جواكى عشان تنجحى فى تحقيقه .. اختك فى الله شهرزاد المساء .. ام لولى وتاتى بحبكم جميعاً فى الله ولا تنسونى بالدعاء بصلاح الحال والصحة وهداية الزوج والابناء ودخول الجنة بلا سابقة عذاب بارك الله فيكم
عنايتى الشخصية قبل الدورة الشهرية على طريقة المشاهير
موضوع جميل وخصوصا حمايه العيد ههههههههههههههههه يا خارجه من باب الحمام ..
استفدت منه كتير يا روحى وان شاء الله كل البنات تستفيد منه ربنا يكرمك ويخليلك لولى وتاتى
تقييمى سبق ردى وفى انتظار مزيد من مواضيعك المميزة يا قمر
شوشو
انت عسسسسسل والله
موضوعك يجنن و أسلوبك رررروعة
وان شاء الله انا راح اعملها 🙂
ربي يسعدك و يوفقك وتتحقق كل أمانيك
أحلى تقييييم لعيونك
استفدت منه كتير يا روحى وان شاء الله كل البنات تستفيد منه ربنا يكرمك ويخليلك لولى وتاتى
تقييمى سبق ردى وفى انتظار مزيد من مواضيعك المميزة يا قمر
وما اتحرمش من رودك على موضوعاتى بارك الله فيكى
انت عسسسسسل والله
موضوعك يجنن و أسلوبك رررروعة
وان شاء الله انا راح اعملها 🙂
ربي يسعدك و يوفقك وتتحقق كل أمانيك
أحلى تقييييم لعيونك
فى ستات غلابة قوى بيصعبوا عليا كنت بفكر فيهم بشكل غريب عملت لهم الموضوع دا
ربنا يجعله لأفادتهم وافادتكم جميعا
تسلم ايدك وتسلمى على النصائح الرااائعه
وانت شكلك ست بيت شاطره ومدبره وفعلا كتير من الستات مع الالتزامات والمسؤليه بينسوا نفسهم تماما 🙁
فى انتظار المزيد من موضوعاتك الرااائعه
