أشهى أطباق لمعكرونة الفيتوتشيني والرافيولي المصنوعة بالبيت . وبالصووووور بسرعةةةة لاااااااا يفوتكم 2024.

بسم الله الرحمن الرحيم
السلام عليكم ورحمة الله وبركاته
اليوم جبتلكم طريقة حلوة وسهلة لعمل عجينة الباستا (المعكرونة) الاساسية
ومنها ممكن تعملوا اي شكل يعجبكم من المعكرونة
نجي للمقادير :
2 كوب طحين متعدد الاستعمالات
رشة ملح
3 حبة كبيرة بيض
2 ملعقة كبيرة زيت زيتون
نحط الطحين على سطح الرخام .. ونعمل حفرة بالوسط
ونرش الملح
ونحط بالحفرة البيض والزيت
ونبدأ بلم الطحين شوي شوي الى الوسط
ونعجن
حتتكون عندنا عجينة متماسكة وصفراء
نتركها لمدة نص ساعة ملفوفة بالنايلون ترتاح
وبعدين نبدأ برقها

انا استعملت لرق العجين آلة يدوية تستعمل لهذا الغرض
ولكن لو مو متوفرة عندك عادي ممكن ترقيها بالشوبك
وبتعطيكي نفس النتيجة بس تنتبهي لسمك الرقاقة تكون نفس سمك المعكرونة العادية الي بنشتريها مغلفة

وبعد ما نرقها اول مرة على السماكة الكبيرة
نخفف السمك
و نطويها على بعض ونرق اكتر من مرة
وبكل مرة نخفف من السمك
لحد ما تصبح بالسماكة المطلوبة
وبعدين نقطعها شرايط طويلة وتكون فتوتشيني راقية ورهيبة
ونسلقها بالماء المغلي مع الملح بس رح تاخد وقت اقل بالسلق من الجاهزة
وكمان لا تحتاج الى وضع زيت بماء السلق
يعني اول ما نحطها بالماء المغلي رح تنزل للقاع متل كل المعجنات وبعد دقيقة رح تطفو على السطح
ونتركها حوالي من 3 الى 4 دقيقة
وبعدين نصفيها
(نصيحة ) :
ادرسي وقتك ونظميه بحيث انك تكوني عاملة الصلصة قبل وقت ولما تشيلي المعكرونة من ماء السلق حطيه فورا على الصلصة المحضرة
وهيك بتكون النتائج مذهلة وافضل من انو تتركيها وبعدين تحضري الصلصة …..
وكمان لا تحتاج ابدا الى غسل بعد السلق
اتركيها بالملح الي عليها وحاولي ما تكتري ملح بالصلصة وبعدين عدلي الطعم حسب الرغبة

انا عملت صلصة وهي
شوية زيت زيتون
وبصلة
وفص ثوم
وملعقتين معجون طماطة
ورشة ملح خفيفة
وفلفل
وريحان مجفف
وأوريغانو مجفف
ولو عندك طازج كمان حطي من الورق شوي
وطحنتها مع بعض بالخلاط
وحطيت منها في المقلاة …
ونزلت عليها شرايط الفتوتشيني
وقلبتها
ومعها شوية زيت زيتون وكمان شرايح الزيتون
وممكن تزودي اعشاب متل ما بتحبي

تقلبيهم مع بعض شوي …وتعدلي الملح والطعم حسب الرغبة
وتقدم

وبهذا الوقت راح نحكي على الرافيولي
الحشوة :
شوية جبنة فيتا
وشوية جبنة شيدر مبروشة
وشوية بقدونس مفروم
خلطتهم منيح مع بعض
والصورة 1 و 2 لخلطة الفتوتشيني
و 3 و 4 لحشوة الرافيولي

واستعملت نفس العجينة عملت نصها فتوتشيني
والنص التاني تركته للرافيولي رقيته منيح وطويته كذا مرة
أطوي وارق واطوي وأرق وهكذا إلى أن وصلت للسمك المطلوب …
ممكن تلاحظو انو لما ترقوها في المرات الاولى بتتشقق
مو مشكلة تابعو الرق والطي وحتشوفوها ضبطت وصارت ملساء وناعمة ومتماسكة

وبعدين..نمد الرقاقة وتكون طويلة شوي
ونحط كتل من الحشوة المحضرة
وبفرشاة فيها ماء نمررها على الحواف حتى تلزق معنا
ثم نطوي العجين على القسم الاول ونحاول باليد نطلع الهوا من القطع وذلك بالضغط الخفيف حول الحشوة
ونقطعها بالقطاعة الخاصة بالرافيولي لانها بتقطع وتلزق الحواف بنفس الوقت
وبتكون زكزاك

وبعدين نسلق المربعات عادي واول ما نحطها بالماء المملح المغلي راح تنزل للقاع وبعدين تطفو على السطح نتركها حوالي 4 الى 5 دقائق…( اكتر من الفتوتشيني بشوية وقت لانها طبقتين من العجين )

وبعدين نحطها مفرودة ومتباعدة في طبق الى حين موعد التقديم

التقديم
لازم نقدم الاكلتين من النار الى الطبق فورا
اولا الفتوتشيني ….. تكون متقلبة مع الصلصة وجاهزة بس نحطها بالطبق ونرش عليها شوية ورق زعتر او ريحان او اي اعشاب انتي بترغبيها
وعليه كمان رشة من الجبنة البرميزان المبشورة وشوية صنوبر محمص
وممكن شوية حبات من البندورة الصغيرة…..cherry tomato

اما الرافيولي ممكن تعمليه مع اي صلصة بتحبيها
الكاربونارا او الطماطم
او الاعشاب او البيستو
وانا اليوم عملتها بسيطة كتيروهي :
نسيح زبدة ونحط فيها اعشاب مجففة أو طازجة حسب الرغبة ولما تسيح الزبدة
نحط عليها مربعات الرافيولي
ونقلبها على الطرفين
ونقدمها وعليها رشة بارميزان وشوية صنوبر محمص وشوية اعشاب
وقليل من البندورة الصغيرة