كيف حال قمرات رجيم الرشيقات
اليوم قررت أحكي لكن تجربتي مع الرياضه
ونتيجتها التي اذهلت كل من حولي
البدايه كانت هنا السنه اللي فاتت
لما دخلت قسم التحدي اشوف ايه المسابقات دي اللي بتتعمل فيه
لاني كانت حالتي صعبه قوي
وكنت باتعب من اقل مجهود
ولا كنت باعرف امشي شويه علي بعض
لدرجة ان زوجي كره الخروج معي من تعبي لو مشينا حتي 5 دقايق
كنت بامشي مثل البيبي اللي بيتعلم المشي لسه
وكان عندي الم في عظمي كله واشتباه في روماتيزم
وكنت تقريبا ما باتحركش من الالم
وكان النصيب اعلان عن التسجيل في مسابقتين واحده لازالة الكرش والتانيه لازالة الارداف
وهم الاتنين مشكله عندي وسمنتي متركز فيهم
المهم كان لي نصيب واشتركت فيهم والحمد لله
وبدأت المسابقات وبدأت اعمل التمارين
واو مره عملتها حسيت بتعب رهييييييييييييييييييب في كل جسمي
لانه كان مرتاح وبدأ يتعب من التمارين
لكن التخنانه ربي يجازيها عني خير شجعتني لما كتبت لها عن تعبي
وقالت ان البدايه اكيد صعبه ولازم استحمل يومين وهايزول التعب
وفعلا بعد كام يوم التعب بدأ يقل واحده واحده لغاية ما راح خالص
وبعد ما كنت باعمل 10 مرات بالعافيه
وصلت لـ 70 مره تمارين ولله الحمد
وكنت باخفف أكلي مع التمارين
ومر الشهر بسلام وجاء وقت الميزان واخذ المقاسات
تخيلوا النتيجه كانت غير متوقعه
نزلت 10 كيلو
كنت 85 اصبحت 75 كيلو
والكرش نزل 10 سم
والارداف نزلت 10 سم
قولوا ما شاء الله
وكنت مش مصدقه نفسي ابداً
ده بقي غير اني بقيت امشي واجري بدون تعب ولا نهجان
حتي زوجي لاحظ ده وبقيت اسبقه في المشي كمان
وحبيت المشي جدا بعد ما كنت نسيته
وبقيت نشيطه اجري واقفز واعمل كل شئ والتعب كله راح والحمد لله
ده معناه ان الرياضه بتنشط الجسم كله
وبتشده وتخلي الحياه جميله ورائعه
فلنجعل الرياضه ضمن الروتين اليومي لنا يا قمرات
اتمني ان تجربتي تكون افادتكن بش ولو بسيط
